Top Stories
പൊന്നാനിയിൽ 117 പുതിയ കോവിഡ് രോഗികൾ
April 24, 2021

24/04/2021
പൊന്നാനി: നഗരസഭയിൽ ഇന്നലെ സ്ഥിരീകരിച്ചത് 117 കോവിഡ് പോസിറ്റീവ് കേസുകൾ. കഴിഞ്ഞ ദിവസങ്ങളെ അപേക്ഷിച്ച് ഉയർന്ന കണക്കാണിത്. ആദ്യ കോവിഡ് ഘട്ടത്തിൽ ജില്ലയിൽ കൂടുതൽ വ്യാപനം നടന്ന പ്രദേശമാണ് പൊന്നാനി. സമീപ പഞ്ചായത്തുകളായ എടപ്പാളിൽ 78 തവനൂർ 69, വട്ടംകുളം 46 എന്നിങ്ങനെയാണ് ഇന്നലെ റിപ്പോർട്ട് ചെയ്ത കോവിഡ് രോഗികളുടെ എണ്ണം.

തുടർച്ചയായ രണ്ടാം ദിനവും ജില്ലയിൽ കോവിഡ് പോസിറ്റീവ് ആകുന്നവരുടെ എണ്ണം 2,500ന് മുകളിൽ. ജില്ലയുടെ ടെസ്റ്റ് പോസിറ്റിവിറ്റി നിരക്കും (28.2) റെക്കോർഡ് ഉയരത്തിലെത്തി. ഇന്നലെ മാത്രം 2,671 പേരാണ് ജില്ലയിൽ കോവിഡ് പോസിറ്റീവ് ആയത്. കഴിഞ്ഞദിവസം 2,776 പേരും കോവിഡ് പോസിറ്റീവ് ആയിരുന്നു. ഇന്നലെ പോസിറ്റീവ് ആയവരിൽ 2,529 പേർക്കും നേരിട്ടുള്ള സമ്പർക്കത്തിലൂടെയാണ് കോവിഡ് പകർന്നത്. രോഗ ഉറവിടമറിയാത്തവരുടെ എണ്ണം 75. മറ്റു രോഗബാധിതരിൽ 10 പേർ വിദേശത്തുനിന്നും 57 പേർ ഇതരസംസ്ഥാനങ്ങളിൽനിന്നും എത്തിയതാണ്.

ഇതുവരെ 643 പേരാണ് കോവിഡ് ബാധിതരായി ജില്ലയിൽ മരിച്ചത്. നിലവിൽ 17,361 പേർ ചികിത്സയിലും 33,796 പേർ നിരീക്ഷണത്തിലുമുണ്ട്. വിദഗ്ധ ചികിത്സയ്ക്കുശേഷം ഇന്നലെ 529 പേർ കൂടി നെഗറ്റീവ് ആയതോടെ ജില്ലയിലെ ഇതുവരെയുള്ള കോവിഡ് മുക്തരുടെ എണ്ണം 1,26,727 ആയി. ജില്ലയിലെ നിയന്ത്രണങ്ങൾ കടുപ്പിക്കുന്നതോടൊപ്പം പ്രതിരോധ നടപടികളുമായി മുന്നോട്ട് പോവുകയാണ് ആരോഗ്യ വകുപ്പും ജില്ലാ ഭരണകൂടവും. സമ്പർക്കമുണ്ടായിട്ടുള്ളവർ പൊതു ഇടങ്ങളിൽ പോകരുതെന്നും വീടുകളിൽത്തന്നെ നിരീക്ഷണത്തിൽ കഴിയണമെന്നും ജില്ലാ മെഡിക്കൽ ഓഫിസർ ഡോ. കെ.സക്കീന അറിയിച്ചു. 

Share this post: