Top Stories
മലയാളം ഉപയോഗിക്കാത്ത ഓഫിസുകള്‍ക്കെതിരെ നടപടി ഉണ്ടാവും.
ഓഫിസുകളില്‍ ജില്ലാ കലക്‌ടര്‍ പരിശോധന നടത്തും
June 20, 2017

20-Jun-2017
മലപ്പുറം : മലയാള ഭാഷ ഓഫിസുകളില്‍ ഔദ്യോഗികമായി ഉപയോഗിക്കുന്നുവെന്ന്‌ ഉറപ്പു വരുത്താന്‍ ജില്ലാതല ഉദ്യോഗസ്ഥര്‍ക്ക്‌ നിര്‍ദ്ദേശം. ഭാഷാ ഉപയോഗം ഉറപ്പു വരുത്തുന്നതിന്റെ ഭാഗമായി ജില്ലാ കലക്‌ടര്‍ ഉള്‍പ്പെട്ട ജില്ലാതല സമിതി തെരഞ്ഞെടുത്ത ജില്ലാ/സബ്‌ ഓഫീസുകളില്‍ പരിശോധന നടത്തും. ഓഫിസ്‌ നടപടികള്‍ മലയാളത്തിലാക്കുന്നതിന്‌ ഗവ. നിര്‍ദ്ദേശിച്ച നടപടികള്‍ പൂര്‍ത്തീകരിക്കാത്തവര്‍ക്കെതിരെ നടപടി സ്വീകരിക്കും. ഭരണ ഭാഷ മലയാള മാക്കുന്നതിന്റെ ഭാഗമായി ഗവ. നിര്‍ദ്ദേശ പ്രകാരം രൂപീകരിച്ച ജില്ലാ തല ഔദ്യോഗിക ഭാഷ സമിതി യോഗത്തിലാണ്‌ ഇതുസംബന്ധിച്ച്‌ നിര്‍ദ്ദേശം ഉദ്യോഗസ്ഥര്‍ക്ക്‌ നല്‍കിയത്‌. കലക്‌ട്രേറ്റില്‍ ചേര്‍ന്നയോഗത്തില്‍ എ.ഡി.എം. ടി.വിജയന്‍ അധ്യക്ഷത വഹിച്ചു. ഓഫീസിലെത്തുന്ന തപാലുകള്‍ ഇംഗ്ലീഷിലാണെങ്കിലും കുറിപ്പ്‌ ഫയലുകള്‍ മലയാളത്തിലായിരിക്കണം. ഓഫീസിന്റെ പേര്‌, തസ്‌തികയുടെ പേര്‌, വാഹനത്തിന്റെ ബോര്‍ഡുകല്‍, സീലുകള്‍ എന്നിവ നിര്‍ബന്ധമായും മലയാളത്തിലും പ്രദര്‍ശിപ്പിക്കണം. എല്ലാ രജിസ്റ്ററുകളും മലയാളത്തിലാക്കണം. ഹൈക്കോടതിയിലേക്കയക്കുന്ന കത്തുകള്‍, സംസ്ഥാനത്തിന്‌ പുറത്തേക്കയക്കുന്ന കത്തുകള്‍ എന്നിവ ഇംഗ്ലീഷിലാകുന്നതില്‍ കുഴപ്പമില്ല. എന്നാല്‍ ഇവയുടെ കുറിപ്പ്‌ ഫയലുകള്‍ നിര്‍ബന്ധമായും മലയാളത്തിലായിരിക്കണം. ജില്ലാ ഓഫീസര്‍മാര്‍ മാസത്തിലൊരിക്കല്‍ സബ്‌ ഓഫീസുകള്‍ സന്ദര്‍ശിക്കുകയും നടപടികള്‍ നിരീക്ഷിക്കുകയും വേണം. അപാകത കണ്ടെത്തിയാല്‍ ഉദ്യോഗസ്ഥനെതിരെ അച്ചടക്ക നടപടി സ്വീകരിച്ച്‌ ജില്ലാ കലക്‌ടര്‍ക്ക്‌ റിപ്പോര്‍ട്ട്‌ ചെയ്യണം. തങ്ങള്‍ക്ക്‌ ലഭിക്കുന്ന കത്തുകള്‍ മലയാളത്തിലല്ലെങ്കില്‍ തിരിച്ചയച്ച്‌ മലയാളത്തില്‍ തയ്യാറാക്കി നല്‍കി ആവശ്യപ്പെടാം. ജില്ലാ ഓഫീസര്‍മാര്‍ മാസാന്ത്യ റിപ്പോര്‍ട്ട്‌ തൊട്ടടുത്ത മാസം അഞ്ചിനകം ജില്ലാ കലക്‌ടര്‍ക്ക്‌ നല്‍കണം. എല്ലാ ജീവനക്കാരും നിര്‍ബന്ധമായും മലയാളം കംപ്യൂട്ടിങ്‌ പഠിച്ചിരിക്കണം. കംപ്യൂട്ടിങ്‌ പരിശീലനം ആവശ്യമുള്ളവരുടെ ലിസ്റ്റ്‌ ജൂലൈ ഏഴിനകം ജില്ലാ കലക്‌ടര്‍ക്ക്‌ നല്‍കണം.

വകുപ്പതല ജില്ലാതല സമിതി രണ്ട്‌ മാസത്തില്‍ ഒരിക്കല്‍ കൂടി പ്രവര്‍ത്തനങ്ങള്‍ അവലോകനം ചെയ്യുന്നതിനും തീരുമാനമായി.

Share this post: