Main News
ജില്ലയില്‍ എട്ട് പ്രാഥമികാരോഗ്യ കേന്ദ്രങ്ങള്‍ കുടുംബാരോഗ്യ കേന്ദ്രങ്ങളായി ഉയര്‍ത്തി മുഖ്യമന്ത്രി പിണറായി വിജയന്‍ ഉദ്ഘാടനം ചെയ്തു

ആര്‍ദ്രം പദ്ധതിയുടെ ഭാഗമായി ആരോഗ്യകേന്ദ്രങ്ങളെ കൂടി കുടുംബാരോഗ്യ കേന്ദ്രങ്ങളാക്കി ഉയര്‍ത്തുന്നതിന്റെ ഉദ്ഘാടനം വീഡിയോ കോണ്‍ഫറന്‍സ് വഴി മുഖ്യമന്ത്രി പിണറായി വിജയന്‍ നിര്‍വഹിച്ചു. ജില്ലയില്‍ എട്ട് കുടുംബാരോഗ്യ കേന്ദ്രങ്ങളാണ് മുഖ്യമന്ത്രി ഉദ്ഘാടനം ചെയ്തത്. പാലപ്പെട്ടി, ഏലംകുളം, മാറാക്കര, വളവന്നൂര്‍, ഓടക്കയം, തൃപ്രങ്ങോട്, മൂര്‍ക്കനാട്, തേവര്‍ കടപ്പുറം തുടങ്ങിയ എട്ട് കുടുംബാരോഗ്യ കേന്ദ്രങ്ങളാണ് മുഖ്യമന്ത്രി ഉദ്ഘാടനം ചെയ്തത്. കോവിഡ് പ്രതിരോധ പ്രവര്‍ത്തനങ്ങള്‍ക്ക് ഉള്‍പ്പെടെ ഉപകരിക്കാവുന്ന വിപുലമായ സൗകര്യങ്ങളാണ് ഈ കേന്ദ്രങ്ങളില്‍ ഒരുക്കിയിരിക്കുന്നത്. ചടങ്ങില്‍ ആരോഗ്യ മന്ത്രി കെ.കെ ശൈലജ ടീച്ചര്‍ അധ്യക്ഷയായി. സ്പീക്കര്‍ പി.ശ്രീരാമകൃഷ്ണന്‍  മുഖ്യാതിഥിയായി. മന്ത്രിമാരായ ഡോ.കെ.ടി ജലീല്‍, എ.സി മൊയ്തീന്‍,  എ.കെ ബാലന്‍, ഇ.പി ജയരാജന്‍, കടന്നപ്പള്ളി രാമചന്ദ്രന്‍ തുടങ്ങിയ മന്ത്രിമാരും, എം.പിമാരും എം.എല്‍.എമാരും വീഡിയോ കോണ്‍ഫറന്‍സിങ് വഴി ഉദ്ഘാടന ചടങ്ങില്‍ പങ്കെടുത്തു.

സംസ്ഥാനം ആരോഗ്യമേഖലയില്‍ നേരത്തെ പ്രസംശ പിടിച്ചുപറ്റിയതാണെന്നും അത് കൂടുതല്‍ മെച്ചപ്പെടുത്താനുള്ള ഉദ്ദേശത്തോടെയാണ് ആര്‍ദ്രം മിഷന്‍ ആരംഭിച്ചതെന്നും മുഖ്യമന്ത്രി പിണറായി വിജയന്‍ പറഞ്ഞു.  ജനപങ്കാളിത്തം പൂര്‍ണതോതില്‍ ഉണ്ടായ സ്ഥലങ്ങളില്‍ മികവുറ്റ കുടുംബാരോഗ്യകേന്ദ്രങ്ങള്‍ കാണുന്നുണ്ട്. മഹാമാരിയെ നേരിടുന്ന ഘട്ടത്തില്‍ രാജ്യവും ലോകവും കേരളത്തിന്റെ പേര് നല്ല മാതൃകയുടെ ഭാഗമായി പല ഘട്ടങ്ങളിലായി എടുത്തു പറഞ്ഞു. നമ്മുടെ വികേന്ദ്രീകരണാസൂത്രണത്തിന്റെ ഭാഗമായി നല്ല തോതില്‍ വ്യാപിച്ചു കിടക്കുന്ന ആരോഗ്യകേന്ദ്രങ്ങളുണ്ട്. പ്രാഥമികാരോഗ്യകേന്ദ്രങ്ങളും കുടുംബാരോഗ്യകേന്ദ്രങ്ങളും പ്രാദേശികമായി ആരോഗ്യസംവിധാനത്തില്‍ സുപ്രധാനമായ പങ്കാണ് വഹിക്കുന്നത്. കേരളത്തില്‍ ഏതു ഗ്രാമീണ മേഖലയെടുത്താലും എത്ര പിന്നോക്കം നില്‍ക്കുന്ന ജനവിഭാഗങ്ങളായാലും ചികിത്സ ലഭ്യമാകുന്നുണ്ടെന്ന് മുഖ്യമന്ത്രി പറഞ്ഞു.

തീരദേശത്തെ ജനങ്ങള്‍ പൂര്‍ണമായും ആശ്രയിക്കുന്ന പാലപ്പെട്ടി കുടുംബാരോഗ്യ കേന്ദ്രത്തില്‍  നാഷണല്‍ ഹെല്‍ത്ത് മിഷനില്‍ നിന്ന് 16 ലക്ഷവും പെരുമ്പടപ്പ് ഗ്രാമപഞ്ചായത്ത് 654503 രൂപയും ചെലവഴിച്ചാണ് ആശുപത്രിയുടെ നവീകരണ പ്രവര്‍ത്തനങ്ങള്‍ നടത്തിയത്. 480000 രൂപ ചെലവഴിച്ചാണ്  ആശുപത്രിയിലെ പഴയ ബ്ലോക്ക് പുനര്‍ വൈദ്യുതീകരണ പ്രവര്‍ത്തനങ്ങള്‍ പൂര്‍ത്തിയാക്കിയത്. കുടുംബാരോഗ്യ കേന്ദ്രമാക്കി ഉയര്‍ത്തുന്നതിന്റെ ഭാഗമായി മാര്‍ച്ച് മാസം മുതല്‍  ആശുപത്രിയില്‍  വൈകീട്ട് ആറ്  വരെ ഒ.പി പ്രവര്‍ത്തിക്കുന്നുണ്ട്.  ചടങ്ങില്‍ പെരുമ്പടപ്പ് ബ്ലോക്ക് പഞ്ചായത്ത് പ്രസിഡന്റ് ആറ്റുണ്ണിതങ്ങള്‍,  പെരുമ്പടപ്പ് ഗ്രാമപഞ്ചായത്ത് പ്രസിഡന്റ് അഷറഫ് ആലുങ്ങല്‍, വൈസ് പ്രസിഡന്റ് ഷാഹിന്‍ ബാന്‍, മെഡിക്കല്‍ ഓഫീസര്‍ ആഷിഖ് അമന്‍, പഞ്ചായത്ത് സെക്രട്ടറി ജയരാജ്, വികസന സ്ഥിരം സമിതി ചെയര്‍മാന്‍മാരായ അബു, കുഞ്ഞിമോന്‍, സുനില്‍ മാസ്റ്റര്‍, മറ്റു ജനപ്രതിനിധികള്‍, ഉദ്യോഗസ്ഥര്‍, ആരോഗ്യ പ്രവര്‍ത്തകര്‍ തുടങ്ങിയവര്‍ പങ്കെടുത്തു.

നാഷനല്‍ ഹെല്‍ത്ത് മിഷനില്‍ നിന്നുള്ള 17 ലക്ഷം രൂപയും പഞ്ചായത്തു വക അഞ്ചുലക്ഷവും സന്നദ്ധ പ്രവര്‍ത്തകരുടെ സ്പോണ്‍സര്‍ഷിപ്പിലൂടെ ലഭിച്ച നാലര ലക്ഷം രൂപയും വിനിയോഗിച്ചാണ് ഏലംകുളം പ്രാഥമികാരോഗ്യ കേന്ദ്രത്തെ കുടുംബാരോഗ്യകേന്ദ്രമാക്കി ഉയര്‍ത്തിയത്. ചടങ്ങില്‍ ബ്ലോക്ക് പഞ്ചായത്ത് പ്രസിഡന്റ് റീന പെട്ടമണ്ണ, പഞ്ചായത്ത് പ്രസിഡന്റ് കെ.അയിഷ, വൈസ് പ്രസിഡന്റ് എം.വി സുഭദ്ര,  സ്ഥിരം സമിതി ചെയര്‍പേഴ്‌സണ്‍മാരായ രമ്യ, ഷീബ, സ്ഥിരം സമിതി ചെയര്‍മാന്‍ ടി.പി അനില്‍, മെഡിക്കല്‍ ഓഫീസര്‍ ഫൗസിയ മുസ്തഫ, പഞ്ചായത്ത് അസിസ്റ്റന്റ് സെക്രട്ടറി സുനില്‍കുമാര്‍, ആരോഗ്യ പ്രവര്‍ത്തകര്‍ തുടങ്ങിയവര്‍ പങ്കെടുത്തു.
കോട്ടക്കല്‍ നിയോജക മണ്ഡലത്തിലെ നാലാമത്തെ കുടുംബാരോഗ്യ കേന്ദ്രമാണ് മാറാക്കര പഞ്ചായത്ത് കുടുംബാരോഗ്യ കേന്ദ്രം.  എന്‍.ആര്‍.എച്ച്.എം, തദ്ദേശ സ്വയംഭരണ സ്ഥാപനങ്ങള്‍, എച്ച്.എം.സി എന്നിവയുടെ സഹായത്തോടെയാണ് അടിസ്ഥാന സൗകര്യങ്ങള്‍ വിപുലപ്പെടുത്തിയത്. ചടങ്ങില്‍ പ്രൊഫ. ആബിദ് ഹുസൈന്‍ തങ്ങള്‍ എം.എല്‍.എ മുഖ്യാതിഥിയായി. ബ്ലോക്ക് പഞ്ചായത്ത് പ്രസിഡന്റ് ആതവനാട് മുഹമ്മദ് കുട്ടി, ഗ്രാമ പഞ്ചായത്ത് പ്രസിഡന്റ് വി. മധുസൂദനന്‍, വൈസ് പ്രസിഡന്റ് ആമിനകല്ലന്‍, ജനപ്രതിനിധികളായ  എ.പി. മൊയ്തീന്‍ കുട്ടി മാസ്റ്റര്‍, കെ.പി. നാരായണന്‍, ഖദീജ പാറൊളി,  മുഹമ്മദലി പളളി മാലില്‍, ടി.പി തിത്തുമ്മു സുഹ്‌റ, ഒ.കെ. സലീന സുബൈര്‍, വി.പി. ഹുസൈന്‍, പാത്തുമ്മ കെ , സമീറ വി.പി, പി.പി. ബഷീര്‍, അഡ്വ. പി. ജാബിര്‍, വഹീദ ബാനു, ഡോ. വിജിത്ത് വിജയശങ്കര്‍, മൂര്‍ക്കത്ത് ഹംസ മാസ്റ്റര്‍, കെ.പി. രമേശ്, വി.കെ. ഷെഫീഖ് മാസ്റ്റര്‍, ഡോ. എം.ടി.ഗീത എന്നിവര്‍ പങ്കെടുത്തു.

പഞ്ചായത്തിന്റെ പ്ലാന്‍ ഫണ്ടും തനത് ഫണ്ടും ചേര്‍ന്ന് 32 ലക്ഷം രൂപയും ടി.എ.അഹമ്മദ് കബീര്‍ എം.എല്‍.എയുടെ ആസ്തി വികസന ഫണ്ടില്‍ നിന്ന് 25 ലക്ഷം രൂപയും ജില്ലാ പഞ്ചായത്തിന്റെ 20 ലക്ഷം രൂപയും ആരോഗ്യ കേരളത്തിന്റെ 15 ലക്ഷം രൂപയും കൂടാതെ സന്നദ്ധ പ്രവര്‍ത്തകരുടെ സ്പോണ്‍സര്‍ഷിപ്പിലൂടെ ലഭിച്ച അഞ്ച് ലക്ഷം രൂപയും ഉപയോഗിച്ചാണ് മൂര്‍ക്കനാട് പ്രാഥമികാരോഗ്യകേന്ദ്രം കുടുംബാരോഗ്യ കേന്ദ്രമാക്കി മാറ്റിയത്. പഞ്ചായത്തു വക 3.50 ലക്ഷത്തിന്റെ നവീകരണ പ്രവര്‍ത്തനങ്ങളും ആശുപത്രിയിലെ ലാബില്‍ ഒരുക്കിയിട്ടുണ്ട്. ചടങ്ങില്‍ ടി.എ. അഹമ്മദ് കബീര്‍ എം.എല്‍.എ, ബ്ലോക്ക് പഞ്ചായത്ത് അംഗം ബിന്ദു, പഞ്ചായത്ത് പ്രസിഡന്റ് രാജഗോപാല്‍, വൈസ് പ്രസിഡന്റ് ലക്ഷ്മി ദേവി, സ്ഥിരം സമിതി ചെയര്‍മാന്‍മാരായ സൈനുദ്ദീന്‍ മാസ്റ്റര്‍, മുരളി മാസ്റ്റര്‍, സ്തിരം സമിതി ചെയര്‍പേഴ്‌സണ്‍ ഷാഹിന, മെഡിക്കല്‍ ഓഫീസര്‍ സമീറ മോള്‍, ഹെല്‍ത്ത് ഇന്‍സ്പെക്ടര്‍ വിന്‍സെന്റ് തുടങ്ങിയവര്‍ പങ്കെടുത്തു.

സൗകര്യപ്രദമായ ഒ.പി കൗണ്ടര്‍, ഫാര്‍മസി, ഇരിപ്പിട സൗകര്യം, ആശുപത്രിയിലെത്തുന്നവര്‍ക്ക് മാനസികോല്ലാസം നല്‍കുന്ന രീതിയില്‍  ചെടികള്‍ എന്നിവ ഉള്‍പ്പടെ 30 ലക്ഷത്തോളം ചെലവഴിച്ചാണ് തൃപ്രങ്ങോട് പ്രാഥമികാരോഗ്യ കേന്ദ്രം കുടുംബാരോഗ്യ കേന്ദ്രമാക്കി മാറ്റിയത്. പുതിയതായി ഒരോ ഡോക്ടര്‍, സ്റ്റാഫ് നഴ്‌സ്, ഫാര്‍മസിസ്റ്റ് എന്നിവരെയും നിയമിച്ചിട്ടുണ്ട്. വൈകുന്നേരങ്ങളിലും ആശുപത്രിയില്‍ ഡോക്ടറുടെ സേവനം ലഭ്യമാകും.  തിരൂര്‍ ബ്ലോക്ക് പഞ്ചായത്ത് പ്രസിഡന്റ് സി.പി റംല, തൃപ്രങ്ങോട് പഞ്ചായത്ത് പ്രസിഡന്റ് പി.കുമാരന്‍, പഞ്ചായത്ത് വൈസ് പ്രസിഡന്റ് കെ.ഷരീഫ, ആരോഗ്യ സ്ഥിരം സമിതി ചെയര്‍മാന്‍ വി.പി ഷാജഹാന്‍, ഗ്രാമ പഞ്ചായത്ത് അംഗം പി.കെ ഹൈദരലി എന്നിവര്‍ പങ്കെടുത്തു.

ഊര്‍ങ്ങാട്ടിരി ഓടക്കയം പ്രാഥമികരോഗ്യ കേന്ദ്രം കുടുംബാരോഗ്യ കേന്ദ്രമായി ഉയര്‍ത്തിയതോടെ  മൂന്ന് സ്ഥിരം ഡോക്ടര്‍മാര്‍, രണ്ട് സ്റ്റാഫ് നഴ്‌സ്, രണ്ട് ഫാര്‍മസിസ്റ്റ് എന്നിവരുടെ സേവനം ഇവിടെ ലഭ്യമാവും. ലബോറട്ടറിയും വൈകുന്നേര ഒ.പി സൗകര്യവും ഇവിടെ ഒരുക്കിയിട്ടുണ്ട്. കൂടാതെ ആര്‍ദ്രം പദ്ധതിയില്‍ ഉള്‍പ്പെടുത്തി 108 ആംബുലന്‍സും ആശുപത്രിയില്‍ പ്രവര്‍ത്തനമാരംഭിച്ചിട്ടുണ്ട്. പി.കെ ബഷീര്‍ എം.എല്‍.എ മുഖ്യാതിഥിയായി. ഊര്‍ങ്ങാട്ടിരി ഗ്രാമപഞ്ചായത്ത് പ്രസിഡന്റ് എന്‍.കെ ഷൗക്കത്തലി, മെഡിക്കല്‍ ഓഫീസര്‍ ഡോ. സലീം ലക്കന്‍,  ജനപ്രതിനിധികള്‍, ആശുപത്രി ജീവനക്കാര്‍ തുടങ്ങിയവര്‍ പങ്കെടുത്തു.

മത്സ്യത്തൊഴിലാളി കുടുംബങ്ങളിലുള്ളവര്‍ക്ക് മികച്ച ചികിത്സ സൗകര്യമൊരുക്കിയാണ് ഉണ്യാലിലെ തേവര്‍ കടപ്പുറം പ്രാഥമികാരോഗ്യ കേന്ദ്രത്തെ കുടുംബാരോഗ്യ കേന്ദ്രമാക്കി ഉയര്‍ത്തിയത്. നിറമരുതൂര്‍ ഗ്രാമപഞ്ചായത്ത് പ്രസിഡന്റ് വി.വി സുഹറ റസാഖ്, വൈസ്പ്രസിഡന്റ് കെ.വി സിദ്ധീഖ്, താനൂര്‍ ബ്ലോക്ക് പഞ്ചായത്ത് സ്ഥിരം സമിതി ചെയര്‍പേഴ്‌സണ്‍ എം.വി സൈനബ, പഞ്ചായത്ത് സ്ഥിരം സമിതി ചെയര്‍പേഴ്‌സണ്‍മാരായ കെ. പ്രേമ, സുബൈദ ഷാലിമാര്‍, സ്ഥിരം സമിതി ചെയര്‍മാന്‍ പി.പി സൈതലവി, പഞ്ചായത്തംഗങ്ങളായ കെ.ടി ശശി, പി.മുസ്തഫ, പഞ്ചായത്ത് സെക്രട്ടറി ടി.കെ ബാബു, മെഡിക്കല്‍ ഓഫീസര്‍ എം.എന്‍ നിഷാന്ത്, ഹെല്‍ത്ത് ഇന്‍സ്‌പെക്ടര്‍ ബാലചന്ദ്രന്‍ എന്നിവര്‍ പങ്കെടുത്തു.
വി.അബ്ദുറഹ്മാന്‍ എം.എല്‍.എയുടെ ആസ്തി വികസന ഫണ്ടില്‍ നിന്ന് അനുവദിച്ച 15 ലക്ഷം രൂപയും നാഷനല്‍ ഹെല്‍ത്ത് മിഷനില്‍ നിന്നുള്ള 10 ലക്ഷം രൂപയും വിനിയോഗിച്ചാണ് മത്സ്യത്തൊഴിലാളികള്‍ ആശ്രയിക്കുന്ന ആശുപത്രിയെ സംസ്ഥാന സര്‍ക്കാര്‍ മികച്ചതാക്കി മാറ്റിയത്.  ഒപി പ്രവര്‍ത്തനം വൈകീട്ട് ആറു വരെയാക്കിയും പുതിയ ഫാര്‍മസി കെട്ടിടം നിര്‍മ്മിച്ചും രോഗികള്‍ക്കായി ടോക്കണ്‍ സംവിധാനം നടപ്പാക്കിയുമാണ് പുതിയ ക്രമീകരണം. രോഗികളുടെ വിശ്രമ കേന്ദ്രം നവീകരിച്ചും ഡോക്ടര്‍മാര്‍ക്ക് പ്രത്യേക ക്യാബിനുകള്‍ സജ്ജീകരിച്ചും ടെലിവിഷന്‍ സ്ഥാപിച്ചും ചുറ്റുമതില്‍ പുനര്‍ നിര്‍മിച്ചും ആശുപത്രിയുടെ മുഖഛായ തന്നെ മാറ്റിയിരിക്കുകയാണ്.
വളവന്നൂര്‍ ഗ്രാമ പഞ്ചായത്തിലെ പ്രാഥമികാരോഗ്യ കേന്ദ്രം കുടുംബാരോഗ്യ കേന്ദ്രമാക്കി ഉയര്‍ത്തുന്ന ചടങ്ങില്‍ താനൂര്‍ ബ്ലോക്ക് പഞ്ചായത്ത് പ്രസിഡന്റ് സി.കെ എ റസാഖ്, പഞ്ചായത്ത് പ്രസിഡന്റ് വിപി സുലൈഖ, താനൂര്‍ ബ്ലോക്ക് സ്ഥിരം സമിതി ചെയര്‍പേഴ്‌സണ്‍ നസീബ അസീസ്, പഞ്ചായത്ത് ആരോഗ്യ സ്ഥിരം സമിതി ചെയര്‍മാന്‍ ഷറഫുദ്ദീന്‍, മെഡിക്കല്‍ ഓഫീസര്‍ ഡോ. വിപി അഹമ്മദ് കുട്ടി തുടങ്ങിയവര്‍ പങ്കെടുത്തു.

Share this post: