പി.പി സുനീർ അഞ്ചാം ക്ലാസിൽ തുടങ്ങിയ രാഷ്ട്രീയ ജീവിതം

 

 

08/03/2019

by അൻവർ അലി

മലപ്പുറം: അഞ്ചാം ക്ലാസിൽ പഠിക്കുമ്പോൾ തുടങ്ങിയതാണ് എൽഡിഎഫ് വയനാട് ലോകസഭാ മണ്ഡലം സ്ഥാനാർത്ഥി പി.പി സുനീറിന്റെ രാഷ്ടീയ പ്രവർത്തനം, ക്ലാസ് ലീഡർ സ്ഥാനത്തേക്ക് എഐഎസ്എഫ് സ്ഥാനാർത്ഥിയായി മത്സരിച്ച് വിജയിച്ച് സുനീർ തുടങ്ങിവെച്ച രാഷ്ട്രീയ ജീവിതം ഇന്ന് സിപിഐ സംസ്ഥാന എക്സിക്യൂട്ടീവ് അംഗമെന്ന നിലയിൽ എത്തി നിൽക്കുന്നു.

പ്രധാനാധ്യാപകനായി വിരമിച്ച പി.പി അബൂബക്കറിന്റേയും പി.എൻ ആയിശയുടെയും നാല് മക്കളിൽ രണ്ടാമനായി 1968 ൽ പൊന്നാനിയിൽ ജനിച്ച സുനീറിന്റെ ജീവിതം എന്നും പൊതു പ്രവർത്തകനായി ജനങ്ങൾക്കൊപ്പമായിരുന്നു. വെളിയംകോട് ഹയർ സെക്കണ്ടറി സ്കൂളിൽ സ്കൂൾ വിദ്യാഭ്യാസം പൂർത്തിയാക്കി. തൃശൂർ സെന്റ് അലോഷ്യസിൽ നിന്ന് പ്രീഡിഗ്രിയും കേരളവർമ്മയിൽ നിന്ന് ബിരുദവും പൊളിറ്റിക്കൽ സയൻസിൽ ബിരുദാനന്തര ബിരുദവും കരസ്ഥമാക്കി. ഇക്കാലയളവിലെല്ലാം വിദ്യാർത്ഥി രാഷട്രീയ പ്രവർത്തനങ്ങുടെ മുന്നണി പോരാളിയായിരുന്നു പി.പി സുനീർ. കേരളവർമ്മയിലെ പഠനകാലത്ത് യൂണിവേഴ്സിറ്റി യൂണിയൻ കൗൺസിലറായി തിരഞ്ഞെടുക്കപ്പെട്ടു. രണ്ട് തവണ കാലിക്കറ്റ് യൂണിവേഴ്സിറ്റിയുടെ വിദ്യാർത്ഥി യൂണിയൻ വൈസ് ചെയർമാനായി പ്രവർത്തിച്ച് വിദ്യാർത്ഥി സമൂഹത്തിന്റെ അംഗീകാരം നേടിയെടുക്കാൻ സുനീറിന് കഴിഞ്ഞു.

വിദ്യാർത്ഥി യുവജന സംഘടനാ നേതൃത്വത്തിൽ നിന്നും സിപിഐയുടെ മുഴുവൻ സമയ പ്രവർത്തകനായി സുനീർ മാറുന്നത് പൊന്നാനി നിയമസഭാ മണ്ഡലം സെക്രട്ടറിയായിട്ടാണ്, തുടർന്ന് ജില്ലാ കൗൺസിൽ അംഗമായും ജില്ലാ അസിസ്റ്റന്റ് സെക്രട്ടറിയായും തിരഞ്ഞെടുക്കപെട്ടു. 2011 മുതൽ 8 വർഷം തുടർച്ചയായി സിപിഐയുടെ മലപ്പുറം ജില്ലാ സെക്രട്ടറിയായി പ്രവർത്തിച്ചു. നിലവിൽ എൽഡിഎഫ് മലപ്പുറം ജില്ലാ കൺവീനറും സിപിഐ സംസ്ഥാന എക്സിക്യൂട്ടീവ് അംഗവും കേരള പ്രവാസി ഫെഡറേഷൻ സംസ്ഥാന ജനറൽ സെക്രട്ടറിയുമാണ്.

1999ലും 2004ലും പൊന്നാനി പാർലമെന്റ് മണ്ഡലം സ്ഥാനാർത്ഥിയായിരുന്ന സുനീർ 2005 ൽ മാറഞ്ചേരിയിൽ നിന്ന് മലപ്പുറം ജില്ലാ പഞ്ചായത്തംഗമായി തിരഞ്ഞെടുക്കപ്പെട്ടു. ജനപ്രധിനിധി എന്ന നിലയിൽ മികവുറ്റ പ്രവർത്തനമാണ് അക്കാലയളവിൽ സുനീർ കാഴ്ച്ചവെച്ചത്. ഹയർ സെക്കണ്ടറി അധ്യാപികയായ കെ.എ ഷാഹിനയാണ് സുനീറിന്റെ ജീവിത പങ്കാളി, വിദ്യാർത്ഥികളായ റിയാന,ലിയാന,സഞ്ജിത് എന്നിവർ മക്കളാണ്

Share this post:

06/02/2019

മലപ്പുറം: വയനാട് സീറ്റിൽ മത്സരിക്കാൻ അവസരം തേടി കോൺഗ്രസിൽ നീണ്ട നിര. പത്തിലധികം നേതാക്കളാണ് മണ്ഡലം ലക്ഷ്യമിട്ട് കരുക്കൾ നീക്കുന്നത്. ദേശീയ ജനറൽ സെക്രട്ടറി കെ.സി വേണുഗോപാൽ, ഷാനിമോൾ ഉസ്മാൻ, ടി സിദ്ദിഖ് തുടങ്ങിയവർകെല്ലാം വയനാട് മത്സരിക്കാനാണ് താൽപര്യമെന്നറിയുന്നു.

അതേ സമയം പുറമേ നിന്നുള്ള സ്ഥാനാർത്ഥികൾ വയനാടിൽ വേണ്ടെന്നാണ് കോൺഗ്രസ് മണ്ഡലം കമ്മറ്റി നിലപാട്, സ്ഥാനാർത്ഥിയെ കെട്ടിയിറക്കാനുള്ള നീക്കം മുന്നിൽ കണ്ട് പുറത്ത് നിന്നുള്ള സ്ഥാനാർത്ഥികൾ വേണ്ടന്ന് വയനാട് മണ്ഡലം കമ്മറ്റി പ്രമേയം പാസാക്കി. കെ.എസ്.യു മലപ്പുറം ജില്ലാ കമ്മറ്റിയും പുറത്ത് നിന്നുള്ള സ്ഥാനാർത്ഥിയെ എതിർത്ത് പരസ്യമായി രംഗത്ത് വന്നു.

എം.എ ഷാനവാസിന്റെ മകളെ സ്ഥാനാർത്ഥി ആക്കുമെന്ന വാർത്തകൾ പുറത്ത് വന്നിരുങ്കെലും നിലവിൽ അതിന് സാധ്യത ഇല്ല.

Share this post: